九四近，朋友心情懨悶，覺得亂世妖孽爆發，唔想投。我勸他，投到底，事關：
一，試吓含住眼淚以外的東西去投票。含與不含，在這個黃金亂世中，你經歷過，無遺憾。
二，你都想測試一下，民調與結果是否一致。假如有得做，考慮下屆做民調博彩，賭邊個in邊個out。評述奧運那位好叻的，唔當運動員係人，評價議員，只要香港有茂利，就有市場。
三，聽聞有候選人打算跪票。平生有幾次機會俾人跪求呢？有票，唔使啪禁藥，一樣做到King。
四，這一屆會變天做new world？你的票，是那個關鍵破紀錄的0.03秒，點捨得落場前棄賽？
五，為了撐港隊你可以去到好盡，為了撐真香港人，抗拒人鬼不分、人神共同體（自封），試問你點可以在神壇面前縮沙，投票容易過上三炷香喎。
六，輪椅票唔關殘奧事，掌心雷隨時跌棒被否。我信，投良心無愧一票，代表香港人寧願炒車都唔接受紫色尿！這樣，無金，但未絕望。