民建聯鍾樹根升呢做咗一屆立法會議員後被個黨用完即棄，喺今屆立法會選舉冇得擔大旗，反而要喺港島區幫企鵝男張國鈞抬轎排名單第二。被人咁對待，難怪Tree根唔開心，報名後同太太歐遊慶生兼散心；有幾出力抬轎？路人皆見。噚日即係投票前兩星期，民建聯喺港島區造勢，佢終於現身嘞；被問到選情？佢話簡直係「危險」！
既然咁危，仲點爭兩席？去旅行有冇畀人詐型？佢話梗係冇，自言太太60大壽，向團隊請咗一星期假，笑言：「有啲人不知幾高興」，佢無明言係乜人，估計係講其他建制團隊，驚Tree根戰鬥力強搶太多票啩。該區其他參選名單，請參閱本報立會選戰網站 http://hk.apple.nextmedia.com/legco2016/region 。