恒生銀行（011）重視企業社會責任，近年贊助嘅「恒生青少年舞台計劃」，上星期就喺深水埗預演咗，零售銀行部一姐關穎嫺（Margaret）都有到場支持，個劇今年9月會喺香港演藝學院正式公演，Margaret咁省鏡，唔知到時會否客串一角？
呢套舞台劇名為《時光倒流香港地》，個show係由一班細路主演，講述外婆阿慈喺深水埗經營一間叫香城飯店嘅餐廳，不過外婆逝世後，飯店就由孫女小琳獨力接手，面對租金貴等等嘅經營困難。有日機緣巧合之下，小琳時光倒流到去60年代，睇到當年外婆點樣克服連串困難，例如貪污，最終成就呢間餐廳。
恒生話，呢個話劇係想表現到香港人嘅獅子山精神，同時都希望青少年可以趁呢個機會展現潛能同表現自己。呢套劇本已經係第2年上演，恒生話，好嘅劇本不妨一用再用，今年舞台與音樂就有唔同，9月公映時，會有高層到場支持，至於有冇高層到時上台客串一角？答案係冇嘅。