馬來西亞嘅羽毛球選手李宗偉喺里約奧運嘅男單決賽不敵諶龍，始終都係擺脫唔到「千年老二」嘅命運，呢位33歲嘅大馬拿督仲透露自己計劃打埋下年嘅世錦賽，就會正式退役！
李宗偉喺2008年北京奧運同埋2012年倫敦奧運，兩度喺羽毛球男單決賽不敵中國球手林丹，連績兩屆屈居亞軍。眼見李宗偉喺里約奧運四強擊敗宿敵「超級丹」，唔少球迷都以為佢喺今屆奧運可以贏番次冠軍，但好可惜佢喺決賽以直落兩盤不敵中國另一位球手諶龍，始終打破唔到「二奶命」。李宗偉賽後都好感慨咁話：「我同林丹係老對手，里約奧運可能係我哋最後一次喺國際大賽交手。」李宗偉咁講，莫非佢決定退役？。呢位33歲嘅大馬拿督就話：「我肯定里約奧運係我最後一次出戰奧運，不過應該會再打多一年啩，𠵱家預計自己最多打埋世錦賽。」
李永波抽水：跟我咪贏
李宗偉連續三屆奧運都屈居亞軍已經夠晒慘，而中國羽毛球隊總教練李永波仲要衝出嚟抽水：「李宗偉係一個好優秀嘅球員，如果佢係我嘅球員，我都會為佢感到驕傲。」不過，之後話鋒一轉，勁厚面皮咁話：「當然，如果佢係我嘅球員就唔同講法喇，因為佢可能一早就可以成為世界冠軍喇。」
球迷代林丹多謝拿督
李宗偉同林丹自從成為職業球手，曾經37次交手，兩個互有輸贏；唔知由幾時開始，「羽客李林」嘅勝負亦開始牽動一班觀眾嘅心。眼見李宗偉終於喺里約奧運嘅男單四強贏到林丹，完場後互換波衫、擁抱對方，有網民亦決定將自己代入林丹，寫咗封信畀李宗偉，多謝佢同自己鬥足咁多年，令自己變得更好，就算贏盡冠軍都唔敢偷懶，因為佢會努力追趕。仲話可以遇到李宗偉係自己嘅福氣，將來一定要同子孫講：「有個叫李宗偉嘅叔叔，係我最偉大嘅對手，亦係最好嘅朋友。」寫到咁感人，唔講真係唔知原來係球迷代林丹寫。