選管會前晚舉行候選人簡介會，因為泛民黨派接連示威，場面非常混亂，簡介會仲多次因此而中斷，但喺社民連、民主黨、工黨同香港眾志等人激烈示威嘅時候，包括游蕙禎等青年新政成員同天水圍民生關注平台王百羽喺現場開心自拍，背景正係高舉橫額示威、俾保安圍嘅泛民，結果唔少網民嬲嬲豬，斥青年新政此舉同泛民拉banner影相一模一樣。網上群情洶湧下，游BB噚日就selfie一事喺個人facebook專頁say sorry！
游BB形容當晚喺會場自拍「實在極不妥當，亦對事件中所有受害人不尊重」，強調抗爭之時，不論手法派別係咪不同，都應該共同對抗港共政權。
坦承違背抗爭原則
游BB坦承自拍事件係「自打嘴巴」，違背咗一直以嚟所講述嘅抗爭原則，愧對對佢寄予期望嘅人，強調自己難辭其咎，惟有喺往後繼續抗爭作交代。
知錯能改，其實好事嚟嘅！八方都睇過網上民情，嘩，真係好多人鬧游BB自拍，有網民留言話「唔做嘢有得執死雞，開心事嚟，開心得滯原形畢露好正常」，唔認衰真係唔太得。
不過，都有網民網開一面，話佢哋只係小朋友啫，「香港新生代仲係差啲，但值得期待」，想佢哋經一事、長一智！各區參選名單，請參閱本報立會選戰網站 http://hk.apple.nextmedia.com/legco2016/region 。
李八方
mailto:pf_lee@appledaily.com