因為喺李波事件發表洗頭艇論聲名大噪嘅吳亮星（圖），唔聲唔聲唔再報名參選金融界，悄悄告別立法會。八方噚日喺工商界籌備國慶活動遇上星爺，梗係問佢點解唔再選？佢話「搵到好嘅接手人，比我年輕咁多，梗係好啦」！唔知大家知唔知，佢個接班人叫振英，不過係姓陳，已經自動當選咗，小圈子選舉係咁㗎嘞！
咁唔使做議會工作，係咪輕鬆好多？星爺透露𠵱家多咗時間做運動，「可以做番服務嘅嘢，乜嘢都有」，但佢仲有唔少議會手尾要清，已安排緊清理自己嘅議辦，同寫埋個總結報告喎！
吳永嘉唔表態撐CY
同星爺同場嘅仲有廠商會副會長吳永嘉Jimmy，佢喺無對手下接咗工業界林大輝嘅議席。Jimmy笑稱冇大輝咁叻，識得妙語連珠，「我唔係佛教徒，所以唔識用法師方式回應問題，不過我會努力嘅」。
咁撐唔撐梁振英連任？當年提名過唐唐選特首嘅Jimmy話，𠵱家都未有人話參選特首喎，所以撐唔撐係言之過早，但佢話會支持有能力嘅人囉，覺得CY喺房屋民生都算做得好，「佢（梁振英）係咪有能力呢？就見仁見智嘞！」