【本報訊】開着銀色跑車的香港羽毛球一姐葉姵延（黑妹），就如其「男仔頭」打法一樣，總是勇往直前，充滿拼勁；可是人生不會是一望無際的大直路，黑妹也試過駛入死胡同，幸得「交通指揮員」引導找回正確方向。駕着跑車越過高山低谷，不再只懂全力疾駛，在個人第三屆奧運會，黑妹的目標是放開固執，享受比賽。
記者：盧曉君 攝影：黃耀興
黑妹2013年在家人的提議下考獲車牌，在友人介紹下選擇了一台二手的Mazda RX8跑車，她說：「反正當時都希望買架車，點解唔買部型啲。朋友介紹下揀咗呢部又平又型嘅車，加上呢款車全港只剩20架，最特別就係用轉子引擎！」自言性格大頭蝦的黑妹表示，起初沒有想過會開車：「我嘅性格真係唔適合開車，做人比較急，開車嘅話會好危險，所以一開始我係覺得自己唔得嘅。」
放開固執 尋更全面打法
不過，最令黑妹感到意外的並非做車主，而是她曾討厭過打羽毛球，更連續幾天躲起來沒有練習。去年奧運積分期開始後，黑妹在上半年的各項比賽都是首圈出局，她說道：「好迷失，好迷茫，搵唔到方向，甚至想過無論今屆奧運去唔去到，之後都會放棄。」當時在死胡同的黑妹，不斷有負面想法：「真係好唔開心，自己年紀都唔細，係咪應該退落嚟？」
能夠走出死胡同，全靠隊友胡贇和魏楠，現年28歲的黑妹說：「2月泰國公開賽前一星期，佢哋同我傾訓練嘅嘢，佢哋話唔忍心見到我咁樣，認為我嘅練習方向唔啱，只係漫無目的咁練。」聽完隊友的指導，黑妹出戰泰國賽在16強以直落兩局擊敗5號種子南韓的裴延姝，晉身久違了的8強，黑妹說：「原來真係可以贏到，唔只係輸贏咁簡單，係一個突破點，前進嘅方向。係胡贇和魏楠令我搵到方向，令我繼續打波，我好感激佢哋。」
不時會開車到海邊放鬆身心的黑妹，在泰國賽後慢慢放開以往的固執，走出低谷，最後更獲得奧運入場券：「以前其他人認識嘅黑妹就係好拼搏，飛撲扣殺好厲害。然後我就會固執咁去做認為啱嘅事，但就連唔啱嘅事都固執咗幾年。當然我唔會完全改變呢種打法，始終係我嘅特色。但現時會諗點樣令自己有優勢，打法更全面，呢啲係我目前要做嘅。」
慶幸自己能在奧運前找到方向，黑妹在女單小組將面對4號種子球手、泰國的拉特查諾。對於奧運目標，黑妹希望做到多年來未能做到的事，就是享受比賽：「才叔（香港羽毛球代表隊前總教練陳智才）經常贈我兩個字，叫我呢個年紀要識得享受。以前好睇重勝負，現時都睇開咗。」從低谷走出來，黑妹坦言難得，所以更加學會珍惜，學懂享受，打出現在擁有的就足夠。
張寧為目標 打到33歲
2020年東京奧運，屆時黑妹將33歲了，曾經視中國張寧為目標的她說：「佢喺33歲嘅時候仲贏到金牌，佢做得到，我亦會話畀自己聽我都可以，一樣可以打到33歲。」從起步一刻到現在，黑妹熱愛羽毛球的心依舊存在，這個初衷亦令她繼續走這條道路：「打完里奧後，我可以同任何人或自己講，我唔會放棄，我會繼續打落去，因為我知道自己做緊乜；我已有方向。」
葉姵延（黑妹）小檔案
年齡：28歲（1987年8月6日）
身高：1.64米
體重：59公斤
世界排名：34位
曾參與2008年北京奧運、2012年倫敦奧運
威水史：
•2013年東亞運女團季軍
•2012年倫敦奧運八強
•2010年亞運女單季軍
•2009年東亞運女單冠軍、女團季軍