上星期香港政壇幕幕高潮，香港民族黨陳浩天被取消參選資格、廉署亂局再生，民望不俗嘅雙曾仲一齊話RUN，霎時令花生指數急升，好想睇CY點迎戰。有政圈中人笑稱，曾鈺成似乎係發口痕，相信佢入閘意欲遠遜鬍鬚曾，之但係曾主席笑騎騎講到好似真，喺立法會選戰前夕都好有用，唔少民建聯中人一聽曾主席咁講，霎時拍爛手掌，無論係咪真心撐，都多謝提供咗個選戰擋箭牌！
不得失梁振英又可攞分
建制派一早預料今屆立法會選舉論壇，遇到嘅問題一定包括支唔支持特首梁振英連任，據聞佢哋早已整合類同口徑，就係𠵱家未知有乜人真係話選喎，睇吓有乜人出戰先啦，換言之都係唔會直接話明支唔支持CY，預咗泛民對手一定狙擊佢哋迴避冇回應！
本來呢，建制派都覺得就算泛民咁樣講都無所謂，始終佢哋有難言之隱，只可以模稜兩可。但𠵱家有個曾主席話考慮選喎，有民建聯中人笑笑口話多謝晒，皆因佢係創黨主席，大條道理政治正確支持啦，不得失梁振英之餘，又可以憑曾主席攞分。
查實如果大家心水清，都會記得曾主席喺立法會收爐前，被記者問到建制派如果被問及支唔支持梁振英做特首時，點樣答好；曾主席當時話明，只要講支持曾鈺成一定攞分，似乎佢都好知道自己嘅價值。突然喺選舉倒數前一個月有的放矢，認真唔簡單；佢愛徒李慧琼日前就喺選舉論壇力撐師傅去馬過咗關！曾主席噚日話動機唔係為立法會候選人減壓，但如果有此效果亦未嘗不是好事。
花生友
周二、四刊出