恒隆地產（101）主席陳啟宗嘅大仔陳文博（Adriel）一向鍾意低調，佢雖然加入公司5、6年，但平時業績會、股東會都唔見佢，不過呢個情況可能有改變喎，事關佢早前升職，獲升為助理董事，噚日佢拍住董事總經理陳南祿出席公司活動，成個人生猛晒。
陳啟宗出名鍾意講嘢，有時直情係口若懸河，有乜理由阿仔會靜嚶嚶唔出聲吖。噚日陳南祿亦好識做，活動完結，佢即刻急急腳走人，交低個場畀太子爺自由發揮。
Adriel面對傳媒亦好夠自信。佢話，升職之後，職責多咗，家陣要睇埋公司建築與發展範疇。佢升職前都已經講笑咁講，話日日做足24粒鐘，家陣唔知佢夠唔夠時間休息，又有冇時間追女仔呢？