立法會選舉提名周五結束，想選超級區議會嘅沙田區議員陳國強仲未夠15個提名。為咗入閘佢以別開生面方式搵提名，噚日晏晝12點喺大圍港鐵站出口擺街站，話24小時不眠不休等區議員嚟提名。八方噚日傍晚問過佢，佢坦承仲未有人嚟提名，雖則希望永遠在明天，但如果過咗24個鐘都未搞掂，就要同兄弟傾吓點算。
手握11個提名、仲欠4個嘅佢話，唔畀提名佢嘅區議員「正一衰仔」，又話好多區議員都唔聽佢電話擺明唔想理佢，博到盡都零反應，真係陰功豬咯！
大熱天時擺街站似乎未必攞到同情，佢自爆有啲街坊叫佢不如轉戰地區直選，但佢希望堅持多一陣，加上未同啲兄弟傾轉戰地區，所以唔想話轉就轉。