香港人點會冇創意？以創新掛帥嘅香港智營禮品設計大賞，過去5年成為本土設計師打響名堂嘅平台，獲獎產品好似燈籠首飾、矽膠小用品等獲海外買家like爆，但香港人卻好少接觸到。香港出口商會（HKEA）本月底會舉行智營設計購物節，畀大家睇睇各得獎設計師嘅作品。
保留香港文化
嗱，大家一定對楊桃、白兔、金魚三款傳統燈籠有深刻印象，呢種代表本地紮作師傅歷久不衰嘅工藝，更加係本土文化象徵。香港猿創創辦人Ronno兩年前就憑一系列香港燈籠首飾獲香港智營禮品設計大賞禮品金獎；其後又設計多款香港主題首飾，包括以維港為主題嘅耳環同吊墜，前者以維港天際線為概念造出圓形耳環，後者更以皇后碼頭鐘聲為靈感，搖動時會發出有層次嘅叮叮聲，原來係模擬昔日碼頭嘅鐘聲。
Ronno一直想設計出屬於香港嘅手信，認為本土文化值得保留，「就算第時冇咗，都可以透過我嘅作品記住」。佢嘅作品喺各大旅遊景點都獲旅客歡迎，今次都會參展，「希望香港自己人都會鍾意」。
計購物節小資料
日期：7月30至31日（星期六及日）
時間：上午11時至晚上8時30分
地點：九龍灣MegaBox5樓
資料來源：HKEA