年輕人問：初入行，做大公司好，還是細公司好？
Mary大細公司都做過，想都不想就說：「想學嘢，唔怕辛苦，梗係做架構精簡嘅細公司啦！」
「架構精簡」搵嚟講啫，即係條team細，人手有限，做來做去都係嗰三幾個人，你身為其中一分子，exposure還會少嗎？老闆一日開三、四個會，手下來來去去那幾個，點會不帶你去見世面。記住，同高自己幾班的人開會是你學嘢的最好機會，同一番話，如何鋪陳、如何層層推進、如何引君入甕、如何以退為進，對方又如何四両撥千斤，高手過招，肯定叫你大開眼界。
人力資源有限，調動自然要靈活，邊有大公司那種分工清晰仔細的奢侈？大公司就話marcom、公共事務、社區關係、廣告、數碼宣傳分開晒不同team處理啫，人少少嘅隊伍之中，每個成員都要扮演好打得的萬能俠，周身刀、樣樣懂得舞，這種經歷對年輕人是好事，太早走「專門」路線，只怕根基打得狹窄、視野不夠宏闊，一味以為自己知得深，其實高分低能，限制了他日發展。睇闊啲，慢慢就會懂得看大局。
在細公司multi-tasking簡直是基本生存條件，人人永遠同時孭住多個項目，才放下這個file，立即又拎起另一個趕下場，唔到傍晚無法靜下來寫proposal，忙到甩轆，辛苦？那是必然的，但後生細仔，𠵱家唔捱，莫非老了才捱？反正青春無敵，洗個面、換套戰衣，又是 sharp醒靚仔靚女一名，怕甚麼。
今天和一起出道的老友話當年，仍然感恩早年有機會捱，口頭禪是：嘩，我哋嗰時一年做人哋做三年嘅嘢呀，早上位都好應份吧！
彭瑪莉
mailto:marypang2015@gmail.com