地產商賣樓，指定pose相係搵兩個負責人出嚟，拎住個宣傳牌畀傳媒影相，standard到不行，新地（016）噚日終於有些少新意，搵來靚仔嘅日本室內設計師做佈景版，唔打得都睇得，起碼都會望多兩眼。
呢位日本設計師叫山際純平，雙眼有啲似李克勤，一頭濃密灰髮加鬚根，型得來帶點粗獷，話佢係明星都應該冇人會懷疑。原來佢已經係第二次同新地合作，今次幫新地新盤「形薈Lime Gala」設計住客會所「Lagoon Gala」與「Horizon Gala」。
只可以話，家陣賣樓，乜嘢花臣都要出齊，除咗奇特樓盤名、按揭優惠、豪華會所、特色單位，連靚仔設計師都出埋，務求令人聯想起個樓盤，「樓神」真係唔係人人都做到㗎。