新地（016）前聯席主席郭炳江上星期獲終審法院批准就貪污案提上訴，並且獲准保釋，佢兒仔郭基煇第一時間話要畀爸爸染番個頭髮先，但望真啲，郭炳江呢個銀髮look都幾可愛靚仔，𠵱家政府都推緊銀髮債喇。
要講財經界入面最具標誌性嘅銀髮look代表，肯肯定係金管局前總裁任志剛，69歲嘅任總，一頭濃密銀髮已經成為佢嘅個人標記。「打工皇帝」霍建寧近年亦係一頭銀白髮。
人老咗或者用腦用得多，自然會頭髮白，如果年過60仲係成頭烏黑頭髮，多數都係染髮，家陣乜都崇尚自然，只要活得健康，面色紅潤，望落精神，銀白髮反而來得有型靚仔。
就連形象設計師張學潤（Nel Nel）都話，只要頭髮白得均勻自然，加埋一個合適嘅髮型，銀髮look其實相當唔錯，有人甚至專登漂白頭髮㖭。