畀100萬本金你，點先可以滾大變52億？耀才（1428）一個為期3個月嘅期貨擂台剛結束，冠軍將100萬元模擬資金，滾大到52億元，而最估佢唔到嘅，係呢位「期貨王」冠軍，並非金融財俊，而係一位老婆婆。
呢位老婆婆鍾意低調，暫時唔肯傳授炒期指秘訣，不過，耀才公關同婆婆傾過，知道對方平時有炒開股票，今次食糊，全靠利用上月23日英國脫歐後嘅市場波動買賣期指。大家都知脫歐翌日，恒指一度大插逾1,200點，全日高低波幅有成1,300點之多，睇準時機沽大量期指，的確可以好和味。
公關指，婆婆成功關鍵在於「肯博」，畢竟遊戲係以模擬資金炒賣，參賽者自然較現實世界炒賣得更加大膽瘋狂。
最終婆婆以52億元嘅成績大幅拋離對手，成功捧走2.5萬元現金獎。奪得亞軍嘅女將亦唔差，將100萬本金變做27億元，袋走1.5萬元現金獎。