陳潔儀（Kit）前晚喺香港開佢第一次個唱「著迷．陳潔儀」演唱會，唱到中途阿Kit有感而發：「知道台灣有個術語叫『芭樂歌』，台灣有呢個對嗌住嚟唱嘅慘情K歌稱呼，好多人鍾意聽，但係我今晚係唔會嗌嘅。」台下即刻傳來如雷嘅掌聲，Kit話：「其實有時開演唱會都要唱一兩首，因為呢個係市場嘅需要。」之後，阿Kit唱咗一首《炫耀》，全晚只此一首，高八度對陳潔儀來講係冇難度。完騷後，阿Kit接受訪問提到「芭樂歌」，問佢係咪唔鍾意唱呢類嗌破喉嚨嘅歌，佢話：「演唱會係有一兩首可以帶動氣氛，但自己唔鍾意唱呢種歌。」
拍劇舊友捧場
Kit請咗譚詠麟做嘉賓，阿倫喺台上又錫又拖，仲大讚阿Kit係靚聲王：「我一路係你歌迷，我唔係擦鞋，以前睇《雪狼湖》已經好想搵機會同你合作，你係靚聲王。」Kit當年拍無綫劇集《妙手仁心II》，合作過嘅吳啟華、林保怡同曹永廉等都有嚟捧場，之但係今次演唱會跟ViuTV有關，所以無綫未有派員到場採訪，阿Kit話：「唔緊要啦！我台上面都講咗只談音樂，不談政治。」
撰文：馮仁昭