城大胡法光運動中心綠色屋頂塌下事件，原來代價真係大得驚人，左丁山在5月25日本欄講過「一年向外籌款捐贈所得，可能一鋪清袋。」點知仲係差好遠，6月10日「南華早報」獨家報導，城大要重建運動中心，估計需費十億元，希望政府補助一啲，城大籌款一啲，加埋就夠數。十億元對不少大富豪，或者係濕濕碎，譬如深圳富豪買歌賦山豪宅，一擲21億，面不改容，城大搵到呢類濶佬捐款嘅話，就一天都光晒。
大學要籌款十億來重建運動中心，係頗高難度嘅挑戰，但胡法光運動中心係城大主要嘅室內考試場地及室內活動場地，唔重建就唔夠地方用，郭位校長相信頂硬上都要周街拍門。好在，董特首與梁特首曾是城大校董會主席，對城大有深厚感情，如果佢兩位大力幫手，又唔同講法。一個在外幫手勸捐，一個在內推動教資會撥款及「責成」發展局從速審批工程，一定事半功倍啦，最好還是策動埋曾財爺在2017/18年財政預算案再推出捐款配對（matching grants）（即大學捐得一蚊，政府可撥款五毫，大學等於收個半，係一個捐款大動力）。今年財政預算案冇呢項配對撥款，令大學界好失望，十億元啫，點解曾財爺咁手緊呀？有記者非正式地問過，據悉有人認為香港嘅大學已經好有錢，以往六輪配對捐款，只係益晒港大，其次中大，所以今年取消，都無傷大雅喎！依家情況又有啲唔同，有沙皇之稱嘅李國章做咗港大校委會主席，一定加多幾錢肉緊為港大籌款，你估佢會唔會在行政會議鼓吹重設「配對基金」吖嗱？李國章嘅港大喎，政府明益都只係令師生條氣順啲嘅啫，順便益埋其他大學，為大學生消消氣，有乜唔好？特別係城大現時在在需財，更加係好事。城大現任校董會主席係胡曉明，就是胡法光先生公子，運動中心重建之後命名，道理上會以大捐款人嘅名字為名，例如「陳大文運動中心」之類，胡公子唔見到爸爸名字，佢嘅感覺會如何？相信郭位校長要諗掂佢。做大學校長真係有太多難題要解決，幾蝦人做。譬如城大除要籌十億重建運動中心，還要籌巨資來成立動物醫學院，用錢打官司控告某些與運動中心塌頂有關嘅專業人士，以求一個公道。事實上係應該打官司嘅，進行屋頂綠化工程竟然無人承認係認可人士，實在匪夷所思也！