【科技籽：發燒專科】
本月初，德福商場的Virtual Zone（VZ）結業，3Think享樂團改詞創作了《街機》一曲爆紅，細問之下，發起人旨呈是一名真街機迷，時至今日仍會蒲機舖。他鍾情舊式跳舞機，VZ結業後只有荃灣等少數地區有得玩。有感很多經典遊戲已隨機舖式微，享樂團希望用歌曲喚起機迷的回憶。「嗰時一放假就着到最靚，朝早九點一開門就落去玩跳舞機。當時機舖係最潮嘅地方，會識到好多朋友，會畀心機苦練技術，我覺得街機屬於我哋呢代人嘅本地文化，只係好多人已經忘記咗，創作呢首歌係希望向街機致敬同勾起更多人嘅回憶。」
蒲機舖改變一生並非個別個案，鼓手Samuel因玩打鼓機接觸音樂，現在是一名鼓樂導師。「如果冇打機，我諗我可能會做設計，過緊另一個人生。」下文受訪者五月、阿Ming、Clarence在各自的遊戲界別中都認識了一群維繫至今、相處逾10年的好機友。無論是「跟機」或「挑機」，打街機那份人與人的交流是家用遊戲不能比擬的。《拳皇》高手五月指有觀眾才能打出水準，音樂遊戲迷阿Ming會跟朋友討論遊戲的作曲編曲，Clarence和機友打足球卡牌遊戲奮戰全日，誇張到叫外賣落機舖。
音樂系 受新血歡迎
由捽碟機、打鼓機、結他機、跳舞機等音樂遊戲組成的《Bemani》系列，還有人氣的洗衣機《MaiMai》到了今日仍然不停推陳出新，吸引了一批年輕機迷和女機迷，可說是機舖最有活力的一個角落。有十多年音樂遊戲年資的阿Ming認為挑機成日輸會無癮，音樂遊戲自我挑戰的玩法較易感覺到進步，易吸引新手。
記者：司徒港燊
攝影：伍慶泉、劉永發、梁志永
編輯：謝慧珊
美術：黃創泰