開波喇！除咗今個星期有美洲國家盃開鑼，下星期就會到歐洲國家盃掀起戰幔，作為可能係香港最多球迷的英格蘭，今屆外圍賽踢到虎虎生威10戰全勝，加上有占美華迪同哈利卡尼兩大英超當紅射手掛帥，睇來今次歐國盃可以有返多少期望？不過潑一潑冷水，歷史係沉重的，翻查資料睇到，過去20年三獅軍團出戰4屆歐國盃，其中3屆就係踢到最後關頭互射12碼出局(96年4強負德國、04年8強負葡萄牙、12年8強負意大利)。12碼有兩個可能，一係入，一係唔入，除咗望天打掛，從運動心理學，似乎可以睇到三方面可解釋到英格蘭可以點樣打破呢個「魔咒」。
今年英格蘭係歐國盃決賽周位於B組，分別同「鄰居」威爾斯、斯洛伐克和俄羅斯同組。英格蘭年年係大賽都予人一種「雷聲大、雨點小」感覺，所以就算23人大軍鋒線有今屆英超神射手哈利卡尼，同幫李斯特城神奇奪冠的「華Dee」，香港的英格蘭球迷唔少都唔敢期望過高。可能為了針對「12碼魔咒」，三獅軍團兩年前2014年世界盃，聘用了著名運動心理學家Dr.Steve Peters，不過當時分組賽行人止步，未有機會睇到三獅軍團互射12碼有無改善。
勿論今屆英格蘭有無機會晉身淘汰賽面對互射12碼階段，12碼背後其實有唔少科學數據。ISPA香港國際運動心理學院總監翁健輝(Nathan)就引述，倫敦政治經濟學院教授、曾踢過西班牙丙組的Ignacio Palacios-Huerta，近年一直研究12碼科學，2008年發表了一份研究報告，分129場賽事1,343球12碼，至少找到3個發現，首先係球證吹哨後2秒內，急於射12碼往往入球率偏低，低到得57%，相反多於2秒先射的就有80%入球率。從96年、04年同12年歐國盃，偏偏睇到不少英格蘭球員例如碧咸、艾殊利楊格，當時都係2秒內就立即起腳，結果分別一飛沖天同射中門眉。
其次就係準備射12碼時，選擇原地退後，抑或向後轉身曾背向龍門，原地退後會有更高入球成功率。Nathan解釋：「當球員有足夠信心時，是不會轉身走，願意面對眼前整個視野；轉身離開，部份係唔想面對眼前這一幕，或想俾自己抽離呢個環境，當思緒一抽離，就會產生唔專注，就會機會導致失誤。」而抽籤得到先得12碼機會的球隊，亦會有60.5%的勝率，後射的球隊只得39.5%勝率，Nathan說：「無論入與不入，都會向對手構成或多或少的心理壓力。」他又指，運動心理學家會從5方面，包括沉著力(Composure)、自信心(Confidence)、專注力(Concentration)、抗壓力(Cope-ability)和凝聚力(Cohesion)，來去改善球員12碼的成功度。
參考資料:
Ignacio Palacios-Huerta, Jose Apesteguia. "Psychological Pressure in Competitive Environments: Evidence from a Randomized Natural Experiment." Barcelona Economics Working Paper Series. Working Paper nº 361, 2008
記者：余瑋
攝影：徐振國