1. 電視與手提電話 不得內進
不用多提，手提電話絕對被列為睡房不受歡迎物品。有佢喺度，等如引入機舖、新聞報道員、成間公司，甚至大堆認識的不認識的朋友同時入房。又打機，又看電視，又要追吓新聞時事同朋友聊天，你隔籬果位一係玩埋一份，一係覺得不被尊重。手提電話絕對係最恐怖的第三者。冇咗佢你會唔識起身？買鬧鐘啦。
2. 臨瞓前減速
不要食飽飯立即飛上床，紐約心理學家Kristin Davin說，放下工作，慢慢洗個面沖個涼，給身體一個「開始休息」的訊號，正如你電腦熄機都有緩衝時間啦，突然按Crl+Alt+Del熄機，部腦都壞得快。除了睡得更好免惡夢，這樣的氣氛也會影響身邊伴侶。
3. 睡房同客房分開
鬼唔知咩，這樣可以營造更好的睡覺同相處氣氛，不過在香港真係有難度。那最少，別把當天穿過的衣服丟床尾，晚晚睡覺都要執。睡前換睡衣，床面保持乾淨，營造「撻上床就係共處時刻」的氣氛，長遠對二人關係有利。
4. 睡前一吻
今晚太攰不做床上運動了，那就錫一啖抱一抱。錫一啖唔係做個樣揩吓面珠果隻，接吻可以釋放荷爾蒙，令你想要對方更多。
5. 不要過份放鬆
雖然話，找到一個能放鬆地在對方面前放屁的人，就是適合的人，係信任一段關係的證據。不過，喺被裏面放屁，喺浪漫氣氛下放屁，真係乜浪漫感覺都呠走o架！
資料來源：Huffpost
記者：陳慧敏、容慧心