「我以前讀書未聽過你呢種工，查實TA（教學助理）做咩㗎？」我問面前這位二三十歲，有碩士學歷，貌似Dickson的華安。
華安支吾片刻，才說：「TA做咩我都唔清楚，總之乜都做吓，除咗教書。我大學主修英文，想教書，但無教育文憑，唯有做住TA。讀教育文憑要實習，你唔喺學校做，點實習先？你唔實習，點做教師先？我本科唔係教育，唯有入學校一路做TA，一路讀文憑，但就算我夠晒Quali都唔代表有位畀我做教師，因為學校縮班，常額教師嘅位有減無增。況且仲有樣嘢叫Perm，做Perm嘅教師好超然，我學校有老師可以成日上堂改簿，叫學生自修，或者發老脾時好似猛虎射球咁，一腳兜學生個書包埋牆，你都吹佢唔脹，於是乎有啲人咪變教畜囉，而無論我幾有教育熱誠，我都只可以做佢哋後備。你問TA做咩，我終於諗到啦，主要係等待果陀。」
我不解：「以前幾十年都無TA，點解而家有啲咁嘅工呢？」
華安答：「2000年開始教育改革，話要搞咩活動教學，就撥款畀學校請人幫手整吓教材，當時中五畢業先做TA，但咁多年學位爆炸，而家就連大學畢業都要做TA。呢份工根本無前途可言，人工亦無監管，所謂加薪，只係學校攞住嚿錢，頭一年俾少啲你，第二年補返多啲，咪造出跳Point嘅假象囉。升職就更加唔駛恨，唔通你叫我做『高級伴讀書僮』，我又會開心啲咩？」
最後華安淡淡說：「馮生，你一定知咩係『中陰身』。其實你畢業嗰日已經同人生告別，你搵到份長工就等於投胎，中間嗰段遊魂野鬼狀態，佛教叫中陰身，而TA就係中陰身。」我無言以對。
（敬覆讀者：六月一日〈錢鍾書夫婦怎樣教女〉的軼事，主要出自《我們的錢瑗》一書，文章提及《我們仨》，只因為後者較為大眾認識。我寫得不夠仔細，特此補充。）