呢個世界講男女平等？邊有咁容易，社會一早將兩性定下性別框框，男子漢要夠硬朗，女子要柔情似水先叫「正常」，但硬漢子其實都有怕醜一面，加拿大兩性專欄作者Bobby Box就踢爆5個男士想講又唔敢俾女士知嘅小秘密，其實佢哋又幾可愛喎。
1) 我冇安全感
唔只女人會心底裏同其他女人比較，男士亦然。成日見到大隻仔post爆肌相或有錢仔晒名錶，點知自己練極都未夠「科」，會令男士覺得自己比人落後一截，缺乏安全感。
2) 我墮入愛河
向外公告「我戀愛了」喺男士間係示弱嘅訊號；而對女伴講「我愛你」，代表男方比女方愛得更多，太投入戀愛有違「男子氣概」。
3) 我唔想做愛
男士形象經常同「渴望性愛」掛勾，但其實男人都係人，都會攰，或者遇上心情唔好時都會冇mood，下次女士表達渴望又被turn down時，體諒一下啦！
4) 我鍾意飲「girly」雞尾酒
出去飲嘢各位男士多數嗌威士忌同啤酒等陽剛之選，但其實唔少cocktail都好得男士歡心，只係礙於唔想俾人覺得「乸型」指指點點先冇柯打。
5) 我都會望男仔
行街睇靚女之餘又點可以唔睇埋靚仔，將路人拎來同自己比較又好，心底裏欣賞對方身形、打扮、髮型，甚至腳上對限量AJ都好，總之喺街男士贒女同時會贒仔，分分鐘比女伴更快留意到靚仔出沒！
記者：黃樂雯
資料來源：《Popsugar》網站