城大綠化天台倒塌，無慘劇發生，可講係香港夠運，城大有運，心水清人士話連梁振英都好似有運，因為佢做過城大校董會主席，校內有不少CY擁躉，假如有慘劇嘅話，一路追究責任，隨時牽連埋CY，影響佢之選情。
好彩，CY現在可以抹一抹汗，低呼一聲有驚無險。城大天台倒塌之最大輸家，可能係環保團體，兩年來一片興旺之綠化天台大潮流，就此急煞停，一窩蜂趕潮流之環保熱，即時撞上冰山，急降溫一兩年，直至屋宇署、環保署諗得出規管條例之前，啲專業認可人士點敢貿貿然簽個名呀！有城大與陳佐堅測量師之羅生門事件，已足以阻嚇所有「認可人士」。
大人物訪港期間，CY一直陪伴左右，笑到四萬咁口，狀甚安樂，似無後顧之憂咁款；其間又傳出小插曲，有人放風，大人物閉門聽取司長匯報之時，當住司局長及常秘面，對曾司長冇咁客氣喎。這段消息由01周刊網絡爆料，即引起哄動。01周刊創刊以來，在中環所見，銷路平平，要幾努力先至搵到一份，根本無人留意，但在網站發表消息，就好容易在社交網站傳開去，連左丁山咁背都收到WhatsApp接力。邊個知情人士放風㗎？有記者話係CY身邊智囊喎，但馮煒光否認咗噃，記者對左丁山講，「馮先生把口都未講得掂，點會有腦袋做智囊？」吓，咁睇低馮先生智慧，啲記者真係唔多客氣。網絡消息出咗之後，次日就有權威政府消息報紙在專欄放風澄清，意圖減少該消息對曾俊華之傷害性，曾俊華又公開講放風之人不道德（但無否認消息之確實性），對放風人唔客氣噃。啲「澄清料」又來自何方呀？有記者告知，來自港島西！咦，隱約見到兩大陣營，直接管理香港事務之張德江有意挺梁，但北京令出多門，未必由張德江說了算，故此又傳出為曾俊華補飛嘅語調。呢場戲都幾好睇，未至明年三月，看來都未知CY是否篤定連任。張德江來港見咁多人，連陳方安生都有份出席聽「校長致訓詞」，全程由中聯辦高層女士陪伴左右，但有兩位名人缺席，即是李嘉誠，染了小病腸胃炎，而唐英年就因為「江蘇薈」開幕唔到場，會所餐廳開幕大得過與人大委員長影相？唐先生都算好有原則啫。從中可以領悟到，香港事務，未必是張德江一人說了算。