香港地做業主不容易，樓價大幅度拋離購買力，固之然令上車困難，有首期想買樓又要跨過銀行按揭審批的重重關口，有實力不用借錢全付樓價買樓，住落竟然有人會冒認是業主賣自己層樓，雖然真業主無實際損失，但嚇到個心離一離就一定會。近日揭發的假業主賣樓行騙事件，以致一些年代久遠的類似騙案，事件的重點癥結都是樓價，平一點就有承接，多年前的一宗案件甚至是多人同時受騙，可見香港人為了買層樓可以如何義無反顧。
從前聽老行尊講，買樓連租約可免則免，無樓睇，如果單位甩皮甩骨，裝修使費一定甘，最怕租客不願走就更加有排煩。真的，從前有租務管制的「保障」下，租客惡過業主，租約完了不想搬，可以當業主冇到，有時想租客走，即使出盡滿天神佛九牛二虎之力都不得要領。現時租約期滿可以收樓，收租業主少了一份戰戰兢兢的感覺，但租客欠租仍然是有排搞的事件。
做收租樓業主固之然怕租客故意遲交租，甚至不交租，唔知因乜理由，租客搵日在單位內睇唔開，單位無啦啦變案發現場，就更加喊都無謂。雖然，一般凶案現場對住宅單位本身不會有結構上的損害，亦不會令樓契產生實質缺漏，過往不少例子是賣方即使隱瞞單位死過人，買方亦不可以此作為踢契理由。
不過，凶宅在心理上的影響就如經典鬼片一樣深入人心，影響買家的接貨勇氣，減低單位的轉讓機會，直接拖低樓價，極端的情況下是銀行不願意提供按揭，一般買家想買都無從入手。做大業主都可以十分麻煩，遇着一些逢霸權必打的熱血人士，收地都可以被升級為社會矛盾事件，輸掉公司形象慘過實質經濟損失。簡單一點去想，業主租層樓出去，租約完結後業主想收樓，但租客不想搬，反而指控業主打壓租樓自由，如果加租就話業主霸權欺壓租客，舊區地舖租客話業主一直不加租才是好業主。民粹觀念抬頭下的香港，做業主真的不容易。
記者：伍志輝