近年嘅立法會幾咁「有為」？嘩，唔係要八方數畀大家睇啩？咁點解明明係生意人，卻突然有「我不入地獄，誰入地獄」嘅諗法，積極考慮參選立法會？王維基噚日出席dbc數碼電台節目自爆，其實係某日下午一支公喺屋企，唔係基督徒嘅佢突然有感召：「呢個job需要我去做，呢樣嘢唔可以去推。」外界盛傳背後有股勢力推動佢參選，莫非就係呢股超然力量？
倡電子投票解決爭議
魔童一直畀人精叻生意人形象，而做立法會議員，顯然係蝕本生意喎，咁都肯制？確令人嘖嘖稱奇。魔童自言雖然係生意佬一名，但同時係人父同香港人噃，唔想香港繼續沉淪，咁就決定做啲嘢，直指︰「做生意係為個人利益，但呢次係只有付出；做生意係有機會贏，但呢次如果真係選，就只係有機會輸。」
既然以有橋見稱，有乜救港妙計？魔童提倡「全民公『表』」，嗱，唔好笑瞇瞇住，個「表」只係表態啫，佢倡議透過電子投票，畀港人就爭議問題表態，退保三跑或東北發展，人人都有say，技術可行兼成本低，亦助弱勢政府提升民意基礎，何樂而不為？佢強調呢個建議同是否參選無關，但當然啦，若有立法會議員呢個身份，就更有法定地位同資格推動啦！
由魔童嘅發迹史，大家都肯肯定知道，佢有種不到黃河心不死嘅毅力，佢噚日節目中仲展示到尼泊爾爬雪山及南極冰潛嘅相，印證事在人為。雖然未決定係咪去馬，但佢已經惡補緊公共政策知識，例如公屋上樓資格等；至於反梁振英係咪會成參選政綱？魔童話喎，ABC（anyone but CY）只係目的，要達到就依靠裝備同手段，難怪積極補課咯。
李八方
mailto:pf_lee@appledaily.com