阿里巴巴主席馬雲講過做首富好痛苦，但做過教師嘅佢，似乎對教育一直抱有熱誠，甚至願意做「補習天王JACK MA」。咁佢當然唔係教人中英數喇，而係幫有意用阿里平台做網購生意嘅人補知識。佢之前喺內地同台灣分別成立「淘寶大學」，噚日就在港推出「淘寶電商培訓計劃」畀人報名。
呢個課程主要提供淘寶營運、營銷等「如何正確使用」阿里同關聯公司產品，仲有網上宣傳技巧同方法，課程為期5日半、共40小時，做功課兼答50條選擇題，合格就可以「畢業」。
學員需繳學費報名費
至於入學要求，唔睇你有幾多個5**，只要中五畢業，識用電腦就可以申請，有兩年經驗同首100個申請者仲會獲優先考慮，成績優異嘅學生更有機會得到利豐集團、莎莎（178）、G2000等大公司嘅電子商貿相關職位嘅面試機會。
不過，想得到大公司入職機會，必須有些少成本。每名學員除咗要交1,500元學費，亦須繳付100元報名費。
阿里香港創業者基金總幹事周駱美琪就話，計劃每期只會招收50人，一年大約舉辦兩次課程，意味就算你係頭100人報名，都未必輪到你，隨時白使一張「紅衫魚」。
無披露會否親身教學
讀完個課程之後，假如無人請會點？課程嘅認受性又如何？阿里香港區銷售總經理吳增炫只係講，「課程對學員創業都有幫助」。課程冇提JACK MA親身教學，一班「馬粉」係咪有啲失望呢？
李華華
mailto:LiWaWa@AppleDaily.com