最後一對《跟住矛盾去旅行》，由「學民女神」周庭，本來係對「Dreambear」劉夢熊，但開拍前劉夢熊被判監，就換上建制區議員兼律師何君堯，估唔到平時係律師嘅佢，俾周庭「質」到完全冇反擊之力，唔知佢係咪特登扮唔識啦，總之問到「六四」「土地政策」「功能組別」等問題，何君堯係完全答唔到，牙尖嘴利嘅周庭，講親都一輪咀，段段精采:
(往機場路上)由日本是否民主國家講到功能組別。。。
何:你知唔知佢哋日本有民主選舉，知唔知同香港差別有幾大?除咗特首嘅問題?
周:咁人哋成個國會都係選出嚟，但係我哋都唔會成個立法會係選出嚟。
何:我哋立法會，係選出嚟o架喎，間選同直選喎
周:係，係，零票當選都係選出嚟，不過係不民主咁選出嚟
何: 自動當選唔係零票當選
周:即係一票都冇啦
何:係有票，只係冇其他候選人，所以係自動當選唔係零票當選
周: 咁呢個係唔合理囉，功能組別本身就係唔合理，有啲幾百票選出嚟，有啲幾萬票選出嚟，呢啲係幾咁不平等，咁當然你可能唔會介意啦，但我哋仲要喺香港生活多5,60年，其實你去日本之前都可以wiki下睇下先。
何: ok，維基(面燶燶)。周庭，我唔係識晒咁多嘢，你知道幾多咪話比我聽，等我知道又會學習，當我細路仔咁囉。
(到日本在van仔)何君堯問一般香港人生活係點?
周:佢(劉鳴煒)唔會知道年青人18歲就要開始排公屋，50幾歲先有。年青人係唔應該係呢個時候諗呢啲問題，但香港就係令到年青人18歲時要諗呢排唔排公屋。
何:點解呢?我18歲嗰時真係冇諗呢啲。
周:香港嘅土地政策係好有問題，地產商買地後會起好貴嘅樓，明明有好多囤積咗嘅地，或者係空置單位又唔去處理。
何:你屋企有幾人住?
周:呢個問題關咩事?我未必係出生係最貧困嘅家庭，唔係住板間房，但係香港好多人係咁樣囉。
何:係幾多到呢?
周:點解何生你問得出呢個問題呢?其實呢啲嘢你係要比我清楚。
何:未必一定，所以我唔知
周:咁你有咩係清楚?香港堅尼系數有幾高?你冇理由唔知道有幾多香港人生活喺最艱苦嘅情況。
何:咁我係香港人都唔知晒香港嘢，地球人都唔會知得晒地球人嘅嘢啦。
(在東京大空襲資料中心)講國民教育
睇到日本二戰時教科書，何君堯話:「40年嘅，都係講愛國呀，美好嘅將來，正面嘅訊息。」
周:其實就係洗腦囉，同一個國家小朋友講我哋o依家嘅戰爭幾有正當性，而呢種洗腦嘅國民教育無論喺有冇戰爭時都唔應該出現，包括香港，當年香港課程指引都係話見到國旗要流眼淚，之後仲話要計分，完全係冇獨立思考。
何:我贊同我哋唔需要洗腦，教育只係灌輸基本知識。
周:但你當年贊成推行國教，雖然佢唔係講戰爭。
何:國民教育只係對國家認知，我諗唔係去洗腦。
周:對國家認知點解中史唔可以呢?點解喺公民教育入面擺咁少錢?喺國民教育入面就擺咁多錢?香港連公民教育都做唔到，就唔好做國民教育啦。
何:又唔得咁講，數學唔得就唔讀書咩?
周:何生不如你分清楚咩叫公民同國民教育啦(兩人同時係咁不斷講)
(在東京大空襲資料中心)周庭問何君堯「六四」立場
周:每一個國家其實佢好有需要去面對佢嘅歷史，包括日本中國，一方面我哋會話日本唔願意承認當年嘅事，其實中國都同樣地有好多唔願意承認自己歷史，每個國家都有呢個責任。
何:你講得啱，最緊要知錯能改，了解歷史可以為未來作計劃。
周:不如唔好扯咁遠啦，講下你點樣睇「六四」。
何: 我都高興你帶出呢個問題，「六四」呢個問題呢，都係我哋中國走過條路，可以話係一個悲劇嚟o架，我曾經講過一條人命損失都嫌多，我自己曾經對六四嚟講學生嘅情懷係完全可以理解，但現實往往有時同我哋現實有差距。
周:但係如果日本人同我講，我哋都係思維唔同，我諗你哋都唔可以接受囉。所以你頭先個答法係有點奇怪，因為你都係唔願意直接回答個問題。
何:我已答咗，六四可以避免就避免，係一個悲劇，當你睇歷史往往都會有人命損失。
周:唔代表你可以正當化政府嘅錯。
何:冇合理化。
周:雖然我好鍾意日本嘅文化，但我唔係盲目祟洋，絕對唔會認同呢種行為，做人唔好雙重標準，當我哋講日本必須面對歷史責任，中國都係一樣。
此時何君堯語塞。
(在公園中)檢討
何君堯笠高帽:佢對日本嘅欣賞程度出乎我所料，但我哋中國咁大嘅歷史再認識多啲呢，呢一代嘅青年發揮嘅機會肯定係無限。
周庭爆seed: 咁你叫佢哋俾返張回鄉證我哋啦不如!叫我哋認識下中國，又唔俾我哋入境。
何:祖國自己有個套考慮因素，可能有特別原因。(blah blah blah…)
何君堯喺節目，係完全冇反擊之力嘅。