雖然男主角由前全國政協劉夢熊換上前律師會會長何君堯，但同「學民女神」周庭「跟住矛盾去旅行」嘅可觀性，依然好高，勢估唔到平日牙尖嘴利嘅何君堯，遇上妹妹仔質問，卻苦無還擊之力；就住六四、土地政策同功能組別等問題，被周庭徹底K.O.。
好似喺東京大空襲資料中心期間，周庭主動問何君堯六四立場（圖），何最初話好高興周庭帶出呢個問題，話六四對中國嚟講係悲劇，重申自己講過一條人命損失都嫌多，學生嘅情懷可以理解，但現實往往同心裏面諗嘅嘢有差距。
咁即係點？冇直接答喎，周庭再抽擊，但何強調已答咗，總之六四可以避免就避免。「唔代表你可以正當化政府嘅錯喎」，呢句周庭問嘅，佢繼而話雖然鍾意日本文化，但唔盲目崇洋，絕對唔認同呢種行為，唔可以雙重標準，當大家話日本要面對歷史責任，中國都一樣，何君堯語塞，勝負已分。