【科技籽：出閘搜新】
近年，三防又細部的action cam越來越有市場，Olympus最新推出的TG-Tracker，就具備204°超廣角鏡頭，並支援4K攝錄，實力相當出眾。又特設壓力計、溫度計及GPS等功能，詳細記錄水底實況，可說專為潛水而設。早前Gadget Guy跟香港潛攝冠軍劉偉達（Victor）到西貢實試新機，雖然當日水質一般，但是新機功能相當實用，身兼潛水教練的他透露，果洲群島是香港的潛攝勝地！
教練Victor可說是潛攝達人，作品經常奪獎，雖然用慣大機，但拿起外形的骰的TG-Tracker時，亦十分欣賞，「唔少action cam要加外殼先可以潛水，上落水好易有霧氣，新機可以直接落水，所以冇呢個問題。加上佢大小適中，無論用手拎住，抑或放喺身度都冇問題。」
新機外形十足一架小型潛艇，不但具30米防水、100kgf防壓、-10℃耐寒、2.1m防撞及防塵性能，又內設GPS、指南針、氣壓計及溫度計等，只要配合專用app，影片便可結合環境數據一同播放，相當專業，Victor直言十分實用，「除咗喺水入面可以隨時睇到資料，之後睇片嗰陣亦可以更加深入精確咁記錄，例如條片影低咗某一種罕見生物，就可以睇番當時嘅水深、水溫，了解佢嘅習性，以及容易啲搵到佢。」美中不足的是，機身下水後便無法接收GPS訊號，只能記錄下水及上水位置，這一功能似乎更加適用於陸上運動，例如記錄行山、長跑或單車等路線。
白平衡準確 續航力出色
TG-Tracker配備204° F2.0的超廣角鏡頭，最高可拍攝4K/30P影片，相片則較失色，只有800萬像素。當日跟Victor到西貢落水試機，記者雖是新手，但機身按鍵夠大易按，加上專用手柄，水中操作亦沒有難度，Victor說：「拍攝質素相當唔錯，特別係超廣角配合4K畫質，好適合拍攝水中嘅大環境，但近攝就差啲，比較難影到細小嘅生物。」但他強調，潛攝時action cam多作隨身記錄及輔助攝影之用，特寫會用回大機，而這類操作簡單的細機亦適合初學者上手，「要讚嘅仲有自動白平衡，潛咗半米就會自動啟動水中拍攝模式，佢嘅自動白平衡相當準確，唔使再設定就可以拍攝。」
新機附設60流明的LED燈，可惜當日水質一般，作用不大。電力方面，新機可連續拍攝90分鐘4K影片，「action cam多數體積細電量少，好多時潛一次已經要換電，但喺船度開蓋換電好易壞機，但呢部TG-Tracker潛咗兩次都仲有電，續航力好高！」
記者：韓繼聰
攝影：林栢鈞、陳永威
編輯：陳國棟
美術：利英豪