呢排ViuTV牽起香港一陣真人騷熱，但去旅行、搏擊同煮飯仔又點會咁易餵飽香港人胃口？4As廣告公司Ogilvy & Mather曼谷分部最近同動物權益組織People for the Ethical Treatment of Animals Foundation（PETA）合作，喺曼谷一個高檔商場砌出一間實質為展覽館的偽皮具店，仲用拍攝真人騷方式，透過鏡頭捕捉參觀者最直接反應。
普普通通一個展覽有乜咁大不了？查實店內陳列出多款皮具用品，表面睇絕對比得上大牌設計，但一打開或試着就會出事，皆因無論係手袋內、外套內、皮帶底部、手套內裡抑或高跟booties內，全部都係血淋淋似心臟跳動設計，佈滿「血漿」同肌肉紋理，都咪話唔嚇人！有好幾位「客人」仲一臉不相信咁打開個袋一睇再睇，認真吊詭。
呢個廣告嘅主要目的，其實都係想勸大家唔好買咁多真皮製品，因為背後都代表住一條生命嘅犧牲。咁講法，其實你同我每日用住嘅皮具，雖然冇血漿，但都一樣血淋淋... ...
記者：黃樂雯