美欣與子豪數年前購入太古城兩房單位，還誕下小女孩，一家三口理應樂也融融。不過，美欣最近得悉2047年「地契懸崖」的消息，嚇到面無血色。「老公，你有冇睇新聞呀？最近有人話香港樓啲地契去到2047年6月30日到期，到時會唔會俾大陸收番？當初你想買樓，OK！我哋仲有二十幾年要供，層樓供完冇幾耐地契就到期，我哋大半世嘅血汗錢咪會冇晒？」
「唔使擔心，我哋層樓叫太古城，地契年期999年，2899年才到期，有別於其他樓在2047年（或批出地皮起計50年）到期。當初岳父叫我哋買呢度就係貪佢年期夠長，將來重建機會亦較其他單幢舊樓低。」子豪明白問題的複雜性，惟有邊煮晚餐邊解釋。
「點解我班姊妹最近做按揭，銀行都話最多分三十年還款？」美欣仍有疑問。「早年銀行批過跨越2047年嘅按揭，不過金管局後來收緊按揭年期，以確保喺加息周期，有空間透過延長按揭年期來減輕供款壓力，與2047年無關。」子豪耐心解釋。
「我哋會唔會好似大陸樓咁，土地續期就要畀一大筆錢？」美欣想起她上司在大陸的慘痛經歷。「十年前薄扶林花園地契續期，只係承擔地租，與及舊法團基金過戶到新法團嘅法律成本。𠵱家距離2047年仲有成三十年，到時無人知個世界會點。」子豪惟有以晚餐轉移視線。
「算啦，都係等班高官議員諗掂佢，反正我哋有份養佢哋……」美欣想到牛扒的滋味，頓時忘記了煩惱。
地產小子
http://propertykids.blogspot.hk/