【本報訊】工聯會及新民黨等七名屯門區議會議員早前發聯署信到立法會要求擱置東灣莫羅瑞華學校於屯門建校計劃。本報昨再查詢各人，大部份明顯軟化及轉軚。其中新民黨朱耀華稱一直支持建校，早前反對是因該地皮三尖八角，局限學校擴展，「求其搵個山旮旯地方畀佢唔係咁公道。」
鄰校校長︰願前往參觀了解
另一區議員工聯會陳文偉稱冀教育局於加強諮詢，但當記者告知其實2月時該校及教育局已做諮詢，陳再說：「附近仲有校長或者老師提出問題嘛」。對於聯署信寫明該校不宜設於多間學校附近，朱耀華說：「嗰封信係校長（蔡國光）意見，唔係我哋主要意見」。代表屯門鄉郊的陶錫源拒絕回應。
立法會教育事務委員會周一討論該校重置，委員之一的新民黨田北辰表明支持項目，估計黨友簽聯署信是因被建制派友好游說，「賣個人情就簽咗」。其餘區議員包括工聯會李洪深、陳有海、新民黨蘇炤成則未能聯絡上。曾寫信大力反對的仁愛堂陳黃淑芳紀念中學校長蔡國光昨再發聲明指項目應充份諮詢。蔡昨接受查詢時指早前說法反映不同人思路，又指願參觀東灣莫羅瑞華學校了解。
■記者蕭洛汶