【電視執位】
林峯曾經是無綫「親生仔」，備受力捧，前年劈炮外闖，有傳因此得罪無綫而遭封殺，即使英皇高層吳雨多次出面，無綫仍然企硬無轉圜餘地。
早前林峯接受無綫新競爭對手ViuTV的《十五分鐘熱度》訪問，節目將由今日起一連三晚11時半播出。林峯在節目中大談工作、感情及多年來在娛樂圈的心路歷程，他說：「𠵱家自由度多咗。」林峯大讚ViuTV刺激電視市場，自己屋企部電視長開ViuTV，明剃舊公司眼眉，他說：「自從ViuTv開台之後，屋企電視就一直都開住ViuTv，節目好有創意，好有新鮮感，我特別欣賞製作團隊嘅創作能力。」他還主動表示若然有節目合適，好有興趣參與。
「享受𠵱家自由度高」
林峯17、8歲便加入無綫藝員訓練班，在娛樂圈經歷很多高高低低、是是非非，主持羅沛琪問林峯：「今時今日係咪已達到百毒不侵嘅境界呢？」林峯說：「就係因為經歷多咗而成長，我好享受𠵱家，對現時狀況好滿意，自由度高，可以花更多時間喺自己感到興趣嘅事上面，選擇自己喜歡嘅工作。而且我已計劃好未來嘅工作方向，繼續歌影視發展，我都有興趣拍真人騷節目。」
另外，林峯將於本月29日在紅館舉行一連三場「Heart Attack林峯演唱會」，他發現未與吳千語拍拖之前的曲風太悲情，他說﹕「近年有愛情關係，心態改變咗，先至發覺情歌係應該甜蜜嘅，所以就開始有唔同風格嘅新歌。」
撰文：嵐山