據英國傳媒透露，今屆溫布頓網球公開賽嘅獎金會全面提升，男女單冠軍有機會都贏得200萬鎊，而總獎金預計亦會超過2,800萬鎊（約3.1億港元），六年內升幅高達100%！喺2010年贏得男女單冠軍嘅拿度同「細威」莎蓮娜，當時只可以攞到100萬鎊，賽事總獎金亦只係1,370萬鎊，但係上屆冠軍祖高域同細威，就分別贏到188萬鎊，總獎金亦去到2,675萬鎊。英國《每日郵報》仲話，一向高薪嘅英超球員喺呢六年期間，人工平均都只係升咗43%咋。