中學時代心目中嘅喜劇，好多最後都變咗一套套嘅鬧劇。
中三，第一次參加歌唱比賽，係，自細愛唱歌，睇見電視入面啱啱流行嘅歌唱比賽，人唱自己又想唱。但係有才華嘅人，好多時都係比較怕醜嘅，我都唔例外，好在有伯樂出現，當社際歌唱比賽就到，社長有日小息專程嚟搵我。「聽講你好鍾意唱歌喎？」「係，係呀！」「咁啱嘞，singing contest仲有個位，你玩唔玩？」「吓，都好喎！」「咁即刻報名啦，揀咩歌呀？」「我諗諗得唔得，聽日話你知吖！」「好嘅！」到聽日，「咩歌呀？」「未諗到！」後日，「咩歌呀？」「就諗到！」大後日，「終於諗到啦！」「Sorry阿Johnny報咗名，冇位喇。」噢，一個歌手就咁埋沒咗。
中四，經過咗多年冇牌嘅生涯，我繼續跑我喜愛嘅1,500米，臨出場嘅時候，隔籬位選手阿堂一句「嘩，你又嚟陪跑呀！」唔知點解，嗰一刻心口一熱，三又四分三個圈之後，我第一次第二名衝線，感謝呢位寸嘴同學嘅鼓勵。嗰一日天空好藍！
中五，實力同自信都大增，又上線，今次目標係超越上年嘅第一名阿興。兩個拍住跑咗三個圈，我嘅策略係一轉入最後直路就放甩佢，腦裏面已經預演咗好多次，嗰然真實畫面都係咁，最後100我發力狂跑，拋離咗阿興，不過佢亦唔放棄死貼住我後面，沉重呼吸聲傳到我耳仔勁唔舒服。終點嘞，我心口壓落去，贏喇！點不知右邊突然傳來慘叫一聲，跟住一個黑影閃過，阿興佢最後兩步仆低咗，但反而壓線快過我！我不但輸咗，仲冇人理，因為個個都走埋去慰問阿興，「好慘呀，跌到咁傷！」「好勁呀，仆低都攞第一！」
當我最仰慕嘅Miss Chan都掛住扶佢嘅時候，我知道原來第二名係屬於輸家嘅！嗰一日，天空好灰！
KEYMAN
節目主持