著名演員萬梓良講過，阻住其他人交配會有好嚴重嘅後果。有見及此，海洋公園由噚日起暫時關閉「大熊貓之旅」展館，等盈盈同樂樂可以專心交配，早日生番隻港產大熊貓BB。
兩年冇「行埋」
海洋公園動物及教育部執行總監蔣素珊話，盈盈過去幾個星期成日玩水、發出「咩」叫聲同有躁動行為。而大熊貓主要用氣味溝通，見到樂樂主動揾盈盈味道嘅頻率越嚟越高，證明佢哋非常接近發情高峯期。
園方已安排兩個交換居所熟悉味道，平日亦都為樂樂做強化後肢肌肉訓練，希望提高自然交配嘅機會，同時會幫盈盈做人工授精增加受孕機會。不過大熊貓懷孕期長達70至324日，就算盈盈有懷孕迹象好似荷爾蒙水平有變化，都要臨生前兩星期先用超聲波見到，隨時係「假懷孕」，更有機會好似上年咁因母體吸收而流產。10歲嘅盈盈樂樂今年係成年後第6個繁殖季節，但因為上年盈盈返咗四川「和番」，兩個最近一次「行埋」已經係2014年。