曼聯周日英超又出事，作客熱刺踢到下半場突然六分鐘內連失三球，慘敗0:3，爭前四告急。戰術大師雲高爾又獻新猷，半場之後派艾舒利楊格入替前鋒拉舒福特，以為有乜奇招，點知係要「左羊」踢中鋒；加埋守將達美安被換入後有災難性演出，雲帥係咪想搞死曼聯？
曼聯作客熱刺，雲高爾排出4-2-3-1陣式，上半場都叫頂得住，冇乜攻勢但至少冇失波。下半場雲帥用楊格入替表現一般嘅拉舒福特，球迷諗住呢個調動，應該係將安東尼馬迪爾放番去佢擅長嘅中鋒位，楊格打左邊，點知雲帥話唔使變，將今季英超入得一球嘅楊格擺最前。
楊格打中鋒想點？
結果變身中鋒嘅楊格，成個下半場一次射門都冇。冇波入都算，最慘係68分鐘，踢得唔錯嘅右後衞科素文沙因傷退下火線，被逼換入達美安，曼聯右後防即時成為重災區，熱刺由70分鐘起，六分鐘內先後由迪利阿里、艾達韋列特同拉美拿各入一粒，3:0搞掂曼聯。
曼聯慘敗後，𠵱家落後第四嘅曼城四分，難為雲高爾賽後堅稱仲可以爭到下屆歐聯席位：「任何球隊都會輸畀任何對手，所以我哋仲有得爭。𠵱家仲有幾場，依然有機會收窄距離，雖然情況已經更加困難。」對於佢喺下半場嘅變陣，雲帥回應話：「喺上半場我哋嘅進攻點冇乜威力，所以我想加強前線球員嘅跑動。」
仲話有機爭前四
雲高爾話仲可以爭前四，數字上確係仲有機嘅；不過有一點可以肯定嘅係，曼聯今季英超已經緣盡冠軍，輸畀熱刺之後數字上已經冇可能追上榜首李斯特城。李城再贏三場就可以提早奪冠，第三場波就喺五月一號作客曼聯，到時紅魔會喺地頭見證李城封王，定係確定無緣前四？