在陸羽與兩位中環名人食午飯，傾閒偈就自然講到梁特機場風雲。S先生話今時今日嘅香港，有一個避忌，就係唔好亂咁撻朵，話我識得梁特、司長、局長、李生之類，講出嚟不特唔會加分，隨時會俾人玩番轉頭，將你所講擺上fb㖭。
Good old days唔係咁樣嘅。以前有位新加坡人從司機成為巨富，據講有所憑藉。憑甚麼，商場傳聞司機不知如何，接載過一位印尼遊客，由於服務態度好，遊客對佢印象甚佳，對佢講：「到耶加達旅行，可以搵吓我。」司機後來真係積蓄到旅行費，到印尼一遊，沿着地址去搵「印尼遊客」飲杯茶，點知竟然係最高領導人住所，「大人物」出嚟同佢握吓手，影張相，就叫警衛送佢返酒店，此後不再見面。哈哈，司機後來收到相片，放在口袋，在印尼遇上適當時間適當人物就拎張相出嚟抰吓，果然萬試萬靈，人人俾面，有路搭路，跟住話做生意就有印尼商人投資。騎騎，司機有膽有腦，從此一帆風順，名列富貴一族。撻朵可以發達，在從前某些國度係有先例嘅，但在21世紀，美國佬好麻煩，搞到撻朵成為避忌，冇咁好玩咯。
點解咁樣講？前一排在晚宴遇到一個跨國集團大中華地區CEO，問佢有冇暑期實習職位俾左丁山嘅mentee，CEO望實左丁山講：「你係舊思想嘞，intern係會有嘅，你可以叫mentee寫信去HR申請，但千祈唔好講係左丁山介紹，更加唔好提我個名，要等HR在全無外來影響之下做選擇！」咁鬼嚴？幾年前賓架Y打個電話俾CEO就搞掂mentee實習安排㗎！CEO話：「多得JP摩根唔少啦，華爾街日報係咁篤，係咁揭露李小加以前嘅電郵，現在我地集團矯枉必須過正，全世界分公司不得聘用高管親屬朋友，嚴查中國大陸申請人是否官二代、三代，知道嘅就唔請。」哦，即係美國政府嚴查華爾街大行聘用官二代是否等同海外賄賂嘅後遺症。其實以前華爾街大行請李公子、劉公子、周千金等等無數富翁後人做Associate，咪又係咁，但幾十年慣例依家連根拔起，識得大集團CEO呀，千祈唔好浪費時間。中環流傳一個例子，某人過五關斬六將幾經辛苦，得到某大行口頭聘用，簽聘書之前，HR問多一句：「你係好適合人選，請問識唔識得我哋邊位董事等人？」當事人答：「CEO係我姑丈！」噢，份工立即冇咗！