市民深宵時分通常覺覺豬，但香港國際機場一班員工卻喺呢個時間出動，包括機管局飛行區助理賴軍。佢全副武裝走入跑道，就係清理輪胎膠屑，因為飛機降落時喺跑道滑行產生高溫，輪胎表層或因此溶解，留低一啲膠屑，如果積存唔清理，會影響跑道甚至導致飛機跣胎，佢會用高壓洗膠車清洗膠屑，每周約4次。
查實飛行區助理仲負責為跑道、滑行道、停機位褪色嘅標記線重新噴油，堪稱機場萬能俠。咪以為工作好簡單，八方覺得身手一定要矯健，因為清理跑道雜物係不分晝夜，只要控制塔下指令就要爭分奪秒，喺飛機升降之間嘅幾分鐘開車入跑道，全速清理螺絲、膠袋、沙石等，全力以赴，無非想確保航班升降安全。