新民黨前晚五周年黨慶，喺灣仔會展筵開逾百席慶生，唔少人着到靚一靚登場，包括啱啱入黨、盛傳9月喺新界東出戰立法會嘅大律師容海恩（Eunice）。
有法律界桂綸鎂之稱嘅Eunice，前晚以黑色開衩連身晚裝登場，耀目之處當然係露香肩兼晒長腿，難怪成為人肉佈景板，成晚俾賓客拉住selfie一番。Eunice話條裙係喺一間本港青年創業嘅舖頭租㗎，身體力行支持吓。唔少人讚佢好弗，係咪特登操㗎先？佢多謝大家讚賞，笑笑口話日日咁頻撲（要選就係咁㗎喎！），唔使操都自然弗喎！
學半日唱閩南歌
Eunice前晚都登埋台，同新民黨青年委員會主席王家揚（Roland）等獻唱閩南歌《愛拼才會贏》。佢唔係福建人，又識講閩南話？Eunice話係跟Roland學㗎，因為Roland係福建人，前日晏晝先一齊練，好在過到關。查實佢過去不時喺公開場合表演，所以表演自如冇乜緊張。而佢同其他青委會成員唱《紅日》時就由過往嘅女高音變重低音。