金像獎頒獎禮結果噚晚公佈，財政司司長曾俊華噚日一朝早就發網誌趁機抽水，近期大打本土牌嘅佢，話自己睇得最多係港產片同荷李活電影。乜佢未成為「習握手」時唔係講過，中產嘅定義係飲咖啡同埋睇法國電影，自己都鍾意睇法國電影咩？佢噚日澄清其實好少睇法國電影，指當年嘅中產論如果令人記得佢係個影迷，都算係個美麗誤會。
想睇《點五步》
此一時，不同彼一時，如今民望高企嘅鬍鬚曾靠撐本土進一步冒起，早前更透露睇過本土意識極濃嘅電影《十年》㖭！佢話作為影迷，渴望欣賞更多具有香港本土特色嘅港產片。佢當然認叻啦，話過去兩份財政預算案都有向香港電影派糖，向電影發展基金注資。
鬍鬚曾稱其中一套受惠於基金資助嘅電影，係陳志發導演嘅《點五步》，故事講述1982年喺沙田成立嘅香港首支少年棒球隊「沙燕隊」。佢憶述當年任沙田助理政務專員，親身見證盧光輝校長同一班小沙燕成立球隊、創造奇蹟嘅經過，早前同盧校長聚首，令佢想快啲入場欣賞《點五步》。
佢又落足鞋油，話香港電影業不單係香港文化創意產業嘅主要組成部份，港產片更加係香港文化象徵之一，「港產片絕對是值得我們珍惜的一道香港旗幟」，佢聽資深製片人話，內地目前最成功嘅電影，製作班底幾乎清一色都有香港人，總之成篇網誌，有讚冇彈港產片啦！
李八方
http://pf_lee @appledaily.com