識把握機會，係每個成功前鋒嘅必備要素；皇家馬德里前鋒基斯坦奴朗拿度（C朗）就喺上周六場國家打吡證明自己唔止識刷數據。喺球場內，佢臨完場前建功，幫皇馬作客2:1反勝巴塞隆拿；之後喺更衣室大合照「攝」得靚位，勁show完美body兼疑似sell自家底橫。咁識把握機會，仲唔係一等一前鋒！
半世紀首度在魯營反勝
喺上周六場國家打吡，賽前先嚟個紀念荷蘭名宿告魯夫嘅儀式，搵嚟一班告魯夫執教巴塞時嘅得意門生向佢致敬；比賽到14分鐘，全場亦再次向告魯夫鼓掌，場面真係好感動㗎！講番場波，主場嘅巴塞雖然喺56分鐘由後衞碧基先開紀錄，但皇馬喺62分鐘由前鋒賓施馬半倒掛入波，追和1:1。
雖然「銀河艦隊」83分鐘有三番四次嚴重犯錯嘅後衞沙治奧拉莫斯終於兩黃一紅被逐，但C朗喺85分鐘妙射破網，助皇馬反勝2:1，仲令巴塞39場不敗紀錄告終；而對上一次皇馬可以喺魯營反勝巴塞，已經係1965年2月28日嘅事，難怪賽後皇馬上下獲西班牙傳媒高度評價，教頭施丹同「BBC」攻擊組合更被指完勝巴塞教頭安歷基同「MSN」㖭。
不過，講到最威兼吐烏氣嘅，就一定係C朗！之前被指今季跌watt兼淨係識刷數據嘅佢，今場終於以行動證明自己係大賽球員，仲將自己喺國家打吡嘅紀錄改寫成24場入16球。成班皇馬球員賽後喺更衣室慶祝時，C朗仲剝剩條底橫同隊友大合照，盡顯fit爆身材之餘，望真啲條純白底橫，仲似係佢嘅自家品牌㖭！
領先6分安歷基淡定
皇馬贏咗國家打吡係好威，但佢哋喺西甲以31戰得69分排第三，仲落後榜首巴塞七分；就算次席馬德里體育會同日贏波都仲落後六分，難怪巴塞教頭安歷基賽後話：「今次落敗並唔會打擊巴塞嘅信心同埋全季嘅表現！」