有冇發現，呢期維港嘅水位又回復番正常？八方有理由相信，同政壇抽水王、自由黨榮譽主席田北俊離港度假有關囉！查實長年累月抽水都咪話唔辛苦，得閒鬆一鬆，有助度橋諗計再發功，所以田少早排休戰一陣，同屋企人去咗奧地利過復活節假！
之但係，田少對呢次家庭樂似乎有啲微言喎，仲話阿女唔聽話。佢喺facebook大呻，話明明叫阿女請個靚女教練陪佢滑雪㗎嘛，「點知佢都唔聽我話嘅，仲要請咗個年紀大過我、又高過我嘅德國佬」，可能同性相拒，令田少feeling disappointed；佢仲po咗同教練嘅合照，個教練確實高佢半個頭喎。