地球上已經冇嘢可以阻到網民挑戰網民！繼早前大陸網民大曬幼過A4紙闊度纖腰，又有歐美高材生曬「沙紙」（畢業證書）唔曬A4紙之後，今次網民唔鬥纖腰鬥細面，齊齊挑戰反手搽唇膏，話要塊面夠細，先至搽到靚唇形唔出界。
呢個挑戰出現短短四、五日，喺手機程式「美拍」已經成為熱烈搜尋首位，戰況非常激烈。有女網民挑戰完之後話「手不痠，臉痠」，亦有人將搽出界歸咎於手短。唔只各位女士玩得開心，有男網民都玩埋一份，結果似蝙蝠俠對手小丑！記者：黃樂雯