自比白宮發言人嘅新聞統籌專員馮煒光，打份日薪過萬嘅筍工，待人處事成日被「表揚」，表現「有目共睹」。
𢭃咁高人工可能因為佢玩facebook玩到出神入化，幾乎一出po就出事，好似近日佢喺fb分享咗屈穎妍一篇題為〈一場精神病人的起義〉嘅文章，內容大致暗將香港民族黨發起人同精神病扯上關係，又話「根據醫管局估算，香港平均每7人就有一人患有精神病，病人本身的妄語怪行，他們自己都不能自控」等。
民主黨深水埗區議員袁海文喺馮煒光fb留言促對方自重，因為單係分享呢篇文，標題已經係對精神病患者嘅負面標籤，令未治療嘅病人諱疾忌醫：「請你尊重你新聞統籌專員的身份，收回分享以上文章，並立即道歉。」
八方問過呢位乳鴿仔，佢話準備向平機會投訴，因為過往喺地區服務接觸過精神病患者，知道佢哋好擔心被標籤甚至誤解，而馮煒光身為公職人員，貼呢篇文章會令公眾對相關政策混淆，希望佢就此道歉。