劉健威話威靈頓街BEP嘅越南牛肉河粉極好，有人食過表示口味各有不同，未盡同意！秘書V係其中一位，佢就推介灣仔Brass Spoon嘞，左丁山呢日無飯局約會，於是叫佢帶路。在中環上的士，秘書V話：「灣仔月街！」司機呆咗一呆？回答話：「乜街？灣仔星街就識，月街未去過。」秘書V話：「咁就去星街啦！」好快就到，過咗一條「電氣街」，秘書V叫停車，行幾步向電車路方向，就係月街，再行多幾步，還有一條日街，左丁山唔係灣仔街坊，依家先至知道灣仔有日街、月街、星街，Sun，Moon，Star俱存，最初唔知係邊位政府仁兄改名嘅呢？
去到Brass Spoon門口，未夠12點，仍未開門，12點正，門口已有人排隊，其中有位貴婦look女士望咗左丁山一眼，不以為意。小店開門後，未到12時15分，店內22張櫈已經坐滿，又有十幾人在外排隊，似足威靈頓街間豚王拉麵店。店外擺咗一個生招牌，就係蘋果果籽版嘅2016年1月12日整版訪問報導，以作招徠。於是叫咗一碗特級牛肉河粉，據講湯底係自家特製不含味精，飲落好清甜，不過唔知是否牛肉貴，碗粉嘅牛肉份量少啲噃，而且咬落冇乜特別，於是再吃一個豬頸肉檬粉，都幾正，是否全港最好呢，存疑。
埋單之時，坐在對面之貴婦look女士突然稱呼一聲：「左生，我係M太呀，你好似唔認得我。」唉吔吔，聞言即刻望真啲，勾起腦海檔案，即刻記得幾年前曾與M先生、M太一齊取道溫哥華去西雅圖。M先生係城中著名律師，M太係業餘書法高人兼係著名閨秀廚師，行出廳堂就成個貴婦型，與秘書V啲OL look完全唔同。點解M太都來幫襯呀？M太話：「我都係第一次嚟，細佬帶我嚟試試嘅。」M太自己係行家都肯走來排隊試食，可見呢間位於偏僻小街嘅Brass Spoon實在有口碑，開食店開到只係做12至7（下午6時45分係last order），星期日及假期休息，都算認真巴閉。不少人話香港舖租貴，扼殺小食店，原來事在人為，有料到嘅話，在一條的士司機都唔識嘅街道開設越南牛肉河粉店都可以賺到笑騎騎。食完之後，秘書V坐的士返中環，左丁山就行路返去，見到有十幾位外國遊客由一位女導遊帶領，在星、月、日三條街頭岳岳，好似睇文物古蹟咁，左丁山完全不知有乜好睇，下次見到丁新豹教授嘅話，一定問吓佢日月星街有乜歷史。