【科技籽：GG鬥室】
唔講唔知，其他國家多把6月1日定為國際兒童節，香港約定俗成依從1931年中華民國規條，視4月4日為兒童節。香港人多數不大重視兒童節，情況就像一些傳統手藝玩具，已經很少人玩，可幸仍有班識貨之人繼續死守。有玩足30年的搖搖高手，也有劍球愛好者玩到去日本考試兼有世界排名。呢堆不死舊玩物有何好玩之處，不妨趁今個兒童節重新審視。
從圓邊形到蝴蝶形 搖足三十年
講起搖搖，八十後或只會想起可樂搖搖，兩個膠圓蓋中間一支木芯，原來現代搖搖已進化到金屬年代，中間更有「啤令」（走珠軸承）增加空中轉動時間（簡稱「空轉」）。已有30年玩搖搖年資的搖搖王黃文健（Ken）說：「當年可口可樂同美國Russell搖搖廠簽咗份30年合約，大約六十年代開始，每隔兩年左右就喺香港搞比賽、搞活動、出搖搖，記得最後一年應該係1992年。我1984年開始玩，點解記得？因為可樂多數夾埋奧運一齊搞。」
搖搖早年於香港的熱潮亦像奧運，每隔一段時間就回來。可樂與Russell搖搖廠合作結束後，就到日本玩具公司在港推廣搖搖，1998年左右不時在大型百貨公司有展區和活動，視為搖搖中興期。到了2002年動畫《超速搖搖》在港播放，迎來第三次搖搖爆發期。在九十年代後期，搖搖設計開始革新，出現了使用「啤令」的蝴蝶形搖搖，原本的圓邊形搖搖空轉時間最多不過數十秒，蝴蝶形搖搖因為啤令和設計減低了對繩的阻力，空轉能達數分鐘以上，更易做出線上花式，甚至有離手離繩等突破招式。
昔日街頭玩意 鬥花式多人玩
新招長玩長有，是令Ken搖足三十年的原因，他坦言《超速搖搖》熱潮後，搖搖在香港漸趨式微。「以前可樂搖搖時期喺士多玩，可以話係街童玩意，當年係潮㗎！大家鬥玩花式就會有心練。跟住入百貨公司玩或者我哋喺學校教，熱潮唔及過往。不過少人玩最大原因係搖搖要長時間練習，小朋友一嚟冇時間，二嚟太多選擇，好難練得好花式，練唔好就冇心機玩。」
Ken和朋友在1998年成立「香港搖搖技術會」（HKYYFC）還有定期舉辦活動，而他在2002年開設的香港唯一搖搖專賣店「Yo Station」亦營運至今。朱子亮在HKYYFC跟Ken等前輩學師，他說：「以前搖搖真係興完一排就冇，可樂冇搞活動之後連搖搖都冇得買，有咗HKYYFC後，玩搖搖嘅人可以keep住嗜好，我跟佢哋學嘢，之後又去教人，有啲似學功夫，一代傳一代。」一班小眾撐起香港搖搖，但活動和教學真的不多，二人指想玩搖搖可由網絡入手，透過YouTube學習其實不難，入門花式不複雜，最緊要練習。
facebook：香港搖搖技術會（Hong Kong Yo Yo Fan Club）
劍球考段試 香港好手世界排名十六
另一手藝玩意劍球，相信大家對它既熟悉又陌生。在台灣劍球是潮物，高雄駁二、台北松菸等文創區都有年輕人玩，香港也不難買到，卻鮮見有人出街玩。考獲「日本劍球協會」國際檢定認證五段的李浩翔，兩年前和朋友郭子豪（毛毛）等人在facebook成立劍球組織「Dama HK」，指劍球還未算在香港流行過。「高峯期都試過有五、六十人聚會，但當中有部份屬同一間中學推廣，好多人對劍球都有興趣，但覺得識玩同唔識玩差太遠，唔敢出嚟玩又冇機會學。」
兩人的的噠噠地舞動劍球，睇到眼花，感覺比有回轉力的搖搖更難上手，難怪嚇怕新手。李浩翔表示，基本功如「止劍」（拋起球將劍身插進球洞）很多人十次內都能成功。「覺得難玩可能係因為用錯劍球，10蚊店買到嗰啲睇落一樣，但競技型劍球經過精心設計，大中小皿、劍身甚至球表面嘅塗漆，都會影響到花式難度。」記者拿起有日本協會認證的劍球，果然十次之內就能用大皿接球。浩翔直言自己沒甚麼天份，學習日本人定的基本十式已經要花不少時間，但就見過人一日學完。現在他已是日本劍球組識「Gloken」世界排名第16位的選手，只要肯練，就一定玩得好。
考段試 做二千次「皿上來回」
玩法方面，劍球和搖搖一樣主玩花式，毛毛有八年資歷，覺得技術學不完。「好玩在你feel到自己一路有進步，睇YouTube又keep住見到新技術。」除了花式，來自日本的劍球也反映到日本人嚴謹的一面，設考段試評測基本功。浩翔遠征日本，目前已得「日本劍球協會」的五段認證。「段試考穩定性，要跟指示做動作，其中一招基本功叫『皿上來回』（玉在中皿與大皿之間來回），到四段試已經要做到二千次。」兩人都覺得劍球是一種講基本功又能憑創意玩出自己花式的有趣運動。新手想玩劍球，浩翔和毛毛指Dama HK無任歡迎，只是場地卻是一大問題。「劍球可以話有場地亦冇場地限制，一個人邊度都玩得，但當你一班人喺街玩就有麻煩。因為大家夜晚先得閒，貪隧道有光，被警察趕；去公園玩，途人又怕劍球危險。試過在康文署租活動室，見我哋玩劍球驚打爛嘢又係唔畀。」劍球迷都希望有個室內地方，供他們好好練習。
facebook：Dama HK
扭計骰 香港和世界接軌比賽
扭計骰是另一長玩長有的不死玩意，已有十年歷史的「好骰同盟」（Hong Kong Rubik's Cube Union）當初只是科技大學的一個學會，近年和國際協會World Cube Association取得聯繫，有關扭計骰的最新消息及國際和本土比賽，都會在facebook專頁刊登，可以說是一個世界級的本土扭計骰組織。不論是搖搖、劍球、扭計骰，記者親身動手玩，都覺得有種電玩遊戲不能比擬的手感，成功練成招式的滿足感更是難以形容，難怪粉絲們多年追隨。
facebook：Hong Kong Rubik's Cube Union 好骰同盟
記者：司徒港燊
攝影：徐振國、許先煜
編輯：陳漢榮
美術：利英豪