【本報訊】曾稱擔心梁振英上場後香港「一鋪清袋」的全國政協常委何柱國，昨拒絕回應會否支持梁振英連任，表明若有其他更合適人士參選，會支持該人，「我都會當面同佢講：『CY（梁振英），呢個人可能好過你』」，但若只有梁一人參選，「無人出來，我會支持佢（梁）連任。」
斥黃之鋒儍仔白癡
身兼星島新聞集團主席的何柱國昨於無綫節目《講清講楚》稱，立法會議員難以溝通，向特首開出難以達成的條件，而梁振英每次進入立法會，「（議員）差唔多要扑埋佢頭」，形容梁「已經好忍讓」。他更指梁振英作風並不強硬，絕非「狼英」，「我覺得佢一啲都唔狼喎！」
何又指，佔領運動令香港經濟持續轉差，並點名斥責前學民思潮召集人黃之鋒：「好似黃之鋒話，大企業無裁員，個儍仔儍嘅咩，見通街係空舖，都白癡嘅，有冇見空舖？有間空舖，咪就係炒咗人囉！」黃之鋒昨午於facebook回應：「儍仔白癡𠵱種標籤，真係一種純情緒發洩嘅小學雞指罵」，同時指何旗下傳媒在銅鑼灣書店事件中為政權塗脂抹粉，做法惡心。
■記者姚國雄