這天洋將當道贏晒前五場，跑到第六場三班1600米，終於首次見到華將贏馬。
主角何澤堯夥拍大熱門告東尼馬房之「加州再豫」後上一攻而破，人馬聯手連捷於同班同程，單Win及組合獨贏A2，派30及19.5元。呢匹澳洲自購新馬入閘扭擰，拉士走勢仍帶稚嫩，惟贏馬姿態卻相當輕鬆，彈甩個半身位，才三歲已兩勝中距離不簡單，下次即使跑高一班，依然有機會取得三連勝。
不過何澤堯為咗贏「加州再豫」，恐怕要換來代價，佢入直路後一度困守內欄冇位出，眼見離終點唔遠，佢把心一橫，將座騎強行向外移出，監粗撞開在其左側的「華麗傳奇」，從而望空發力追趕，騎法勇猛之餘，卻明顯是打茅波，「華麗傳奇」被撞後亦無心戀戰只得第五，何澤堯賽後難免要被傳召研訊，使唔使罰則聽天由命！
呢場二至四名馬都係過江龍壓陣，分別為「邦之星」（巫斯義）、「財歡笑」（史卓豐）及「好好機會」（郭能），四重彩派十萬蚊鬆啲。三T則冇人中正獎，安慰獎派四萬九千幾。
今場位置Q「奮鬥雄心」拖「紅牡丹」、「邦之星」及「財歡笑」三瓣，臨場都一度受巨額過關影響而賠率大跌，結果前駒三甲不入，導致呢三條位置Q統統輸晒。