【本報訊】近日學生動輒輕生，認為死亡是一種解脫；聖匠堂死亡學院士為使年輕人認清死亡，清明前夕首次帶領90後大專生，跑到剛開放的文錦渡禁區內的沙嶺公墓。黃土上，亂草叢，密麻麻東歪西倒小石碑，沒名沒姓，只有一組號碼，猶如亂葬崗。目睹此情此景，人馬上長大，大家嚷着不想孤單的葬在公墓；從死到生，大家感受活着的幸福，自毀非解脫，只會帶來身邊親人永不磨滅的哀痛。
記者：蔡朗清
聖公會聖匠堂長者地區中心安寧服務部高級服務經理梁梓敦，上月30日帶領4名公開大學二年級學生，到文錦渡沙嶺公墓。擁有美國認可死亡學院士資格的他表示，本港從沒一科叫死亡學，大家對死亡的認識似近還遠，「以前我哋主要教育長者面對死亡，帶佢哋去殯儀館；𠵱家啲老人家從容面對，反而啲中年、年輕人就好驚講生死」。
梁說近日不少學生動輒自殺輕生，明顯誤解死亡，「香港冇生死教育，啲學生主要從電影等渠道知悉，覺得死係好浪漫，好英雄式咁死，係一種解脫，幾個鏡頭後親人就唔再傷心。完全忽略死亡帶來身邊人無盡嘅痛苦，突然死亡對親人嘅打擊更大」。
近月文錦渡禁區開放，毋須禁區紙就可到沙嶺公墓，梁梓敦決定首次帶學生來體驗這個不一樣的墳場。公墓分棺木及骨灰兩大區，分佈不同山頭。一行人先到棺木區，只見一個個荒涼山頭，密麻麻一個個小石碑，碑上只刻有安葬年份及一個代表死者的號碼，沒名沒姓沒遺照，沒一束花，只得𤏸土雜草，和一群餓瘋了的蚊。
「更珍惜身邊朋友」
同學們走近墓碑，梁梓敦告誡勿走近碑前，不是對死者不敬，而是怕踩穿棺木。90後Arnold半信半疑反問：「有咁薄嘅棺蓋？」未幾行過一副剛起的棺木，Arnold驚覺「真係好薄」，他說過去聽過有這個公墓，但第一次到來，見到一遍荒涼欷歔地說：「見到呢啲無名墳墓，人與人之間關係係咪咁冷漠？我唔想自己成為佢哋一分子，我要好好活着，好好對人，有朝一日，最後有人送我一程。」Ryan及Ruby亦不約而同地說：「香港竟然一年有幾百個呢啲冇人認領嘅遺體，親身見到好震撼，在生更加要珍惜身邊嘅朋友。」
梁指棺木葬了7年後，需起出來火化，並放在另一邊山頭的骨灰區，「火化咗之後，唔會逐個分，會將同一年嘅骨灰放埋一齊」。眾人走了近一個小時，來到骨灰區，看到一個個不同年份的墓碑，而每個年份的墓碑卻安放數百個死者的骨灰。目睹無名死者最後結局，同學欷歔地按自己出生年份的墓碑前放下鮮花，其中Natalie感觸地說，曾有小學同學在校園輕生，以為一了百了，但為身邊親朋帶來很多痛苦，「今次嚟到公墓見到咁嘅景象，覺得更要珍惜生命，做啲有意義嘅嘢」。梁梓敦表示本月16日會舉辦一個50名學生及義工參加的大型「賞心閱墓」沙嶺導向團。
學生感想
Arnold：
可能好多人勞碌一生，到最後都係得自己一個（長埋墓地）……其實人同人之間係咪真係咁冷漠呢？
Ruby：
冇諗過香港原來咁多人係冇朋友或屋企人做後事，覺得好慘。我會喺仲在生嗰時對屋企人、朋友更加好。